Katua IPDKR Ngalebakatn Basa

SAMBUTAN KETUA UMUM IPDKR

Tanggal 20 Februari 2016

Dalam Rangka Peringatan Hari Bahasa Ibu Internasional

Tarima’ kasih untu’ waktu nang dah dimare’atn ka’ aku.

Adil ka’ Talino, Bacuramin ka’ Saruga, Basengat ka’ Jubata

Salam BABABA

Nang kami maradatatn Bapak Yusing selaku anggota dewan penasehat IPDKR

Nang kami maradatatn Kapala Desa Lingga

Nang kami maradatatn Kapala Desa Pancaroba

Nang kami maradatatn Kapala Desa Taluk Bakukng

Nang kami maradatatn Kapala Desa Korek

Nang kami maradatatn Timanggong Binua Sunge Samak

Nang kami maradatatn Pasirah, Tuha Tumpuk, Pamane Kampokng Alaman

Man sigana undangan, dewan juri, tokoh adat, tokoh masyarakat, samua ayukng-ayukng nang atakng kak radakng diri’ malam ngian.

Buo buo antuah, salamat malam man salam sajahtra

Jubata, asal nange, samua nang ada, Iya ampu’nya, samua nang ada baarap ka’ Iya. KaidupatNya ka’ atas sagala kadiaman, ka’ atas samua pamuatatnNya untu’ koa diri’ arus basukur malam ngian dapat bakomo’ kak radakng ngian batubuh baik, ringakng, batubuh nyaman.

Dari talu ratus anam puluh lima malam nang ada kak tahutn dua ribu anam balas ngian, malam ngian salah sote’ nang paling barati untu’ diri’ samua tarutama untu’ diri’ bujakng dara dayak nang ada ka’ tumpuk, radakng, binua ngian. Ngahe malam ngian barati? barang diri’ maok barusaha mulakngi’ agi’ bahasa diri’ nang dah makin ebet pamakenya, nang dah manyak tingalapm kata-kata tuhanya, nang dah inak jaman urakng, udik ja dangan, lucu, kuno. Tapi malam ngian diri’ ada ka’ dian, bukti kade’ diri’ masih maok paduli kak bahasa diri’ ngian, bangga diri’ ada warisan budaya bahasa. Junyukng tingi bahasa diri’ koa tema nang dimilih panitia, ngka’ pas sidi man kaidupatn urakng diri’ ampeatn ari, nang inak nyujukng bahasanya babaro, labih repo babahasa dangan, engga’ iya ba lulu ba gue gue, ba kite2, bapapi mami, woles, kepo, capcus, ibarat lomba’ diri’ ngian dah kalah didangan, masa’ diri’ ampu’ ai’ tanah lalu tapangaruh di urakng nang atakng. Batol na’ ayukng2? Untu’ koa kagiatan diri malam ngian, dari mula-mula sampe kak ujukng ana make bahasa diri’, batol diri’ ka’ tumpuk radakng ato ka’ pasaro’ palaya ngian tiap ari make bahasa diri’, nang koa bahasa saari2, coba diri’ ngomong make bahasa diri’ ka’ dalapm situasi nang resmi, miah boh payahnya jukut ahe, diri’ inak biasa, kade’ meraatn dangan sih nyaman make bahasa diri’ ngian. Untu’ koa ana diri’ sama2 nele’ ayukng2, anak, kamenakatn nang akan pidato man basingara (stand up comedy), katika panitia ngalap acara ngian badakah nang malatn, sakali maca syaratnya make bahasa diri’ langsung layu’ iya, kade’ make bahasa indonesia atau bahasa inggris sih aku ikut, koa dah sote’ tanda-tanda bahasa diri’ notok Red Code ,padahal derajat bahasa diri’ ngian sama man bahasa maepun nang ada ka’ dunia ngian.

Sabagai Katua Umum IPDKR, aku batarima kasih kak sigana panitia nang dah bapayah-payah nyiapatn acara diri’ ngian, aku nau’an lemae badakahnya jukut nang ngipa’ tapi dapat ia kak koa atasi. Kagiatan lomba’ pidato babahasa diri’ man stand up babahasa diri’ ngian batujuan untu’ numuhan rasa repo man bangga babahasa diri’, nyaga warisan budaya bahasa diri’, nojokatn ka’ dangan kade’ diri’ koa bisa uga’ eksis, ngian ampu’ ai’ tanah diri’, urakng atakng nang arus ikut bahasa diri’ buke sabaliknya.

pa’ uda’ nu’ uda’, pak tuha, man ayukng2 samua, IPDKR koa dama pakomo’an kami ngian, IPDKR ngian buke’ nu’ binua tertentu, buke’ hanya nu’ ambawang, buke’ hanya nu’ kuala mandor B, tapi untu’ diri’ samua bujakng dara dayak nang ada kak pasaro palaya ngian. Kabupaten kubu raya.

Paringatan ari bahasa uwe’ internasional ngian salah sote’ kagiatan diri’, jukut ngian ngka’ nang miah ratinya kak urakng diri’, barang ampeatn penelitian dunia dah nyonteng dalapm saminggu ada sote’ bahasa uwe’ nang langit. Kak indonesia dah ada boh contonya.

Ada ugak suku nang dah ampir tinggal curita, macam suku mantawai kak sumatra barat nang anak muda’nya bai’ nuna’an budaya asli urakng tuhanya tambah agi’ urakng luar nang batama’an, suku asli papua nang bakabiasaan na’ gagas, panyocok, seks bebas akibat seks bebas koa panyakit banularatn, HIV AIDS samintara obat na’ ada sakali seko’ jadi pidara, suku togutil ka’ halmahera nang hanya idup kak udas, ampeatn tanahnya dah sisa sabebet agi’ nang lain abis di perusahaan pertambangan na’ap, ada limbah nang ngatangan panyakit kak mereka, padahal ka’ udas koalah iya bagago’ idup , suku anak dalapm ka’ jambi, nang diapm ka’ udas uga’ tapi dah makin tapeper di perusahaan sawit. Diri’ bai’ hal-hal nang lekoa terjadi kak diri’ Dayak.

Diri’ nang gi’ muda’ ngianlah nang dingarapatn, kade’ buke’ diri’ saea’ agi’. Ampeatn diri’ arus mulai’ bataporatn sigana jukut nang baik, idup barani, baradat, babasa, baati baraseh, samak man Jubata, tamagah lea mata ari.

Mata’ Ari ngincakng kabaranian. Ka’ Mata’ Ari lah talino nang gi’ muda’ ngian balajar rajitn, baconto barang mata’ ari ina’ paranah pamalas, samua tapuk taporatn Jubata katele’atn, jukut nang ka’ entok tamu di gago’i’ di talino.

Ayukng-ayukng, diri’ ka’ kaidupatn ngian badantar tamah, ahe agi’ ka’ karamigi palawakng ato ka’ tumpuk nang rami nang manyak. Ame diri’ lupa ka’ adat aturan, ame lupa idup baparibasa, masih badakah jukut nang arus diri jaga, diri’ pihara, silat dayak dah sia’ ebet nang pane, tari asli dayak dah susah ditamu, baju adat asli diri’ dah inak jelas lemae corak aslinya, bahasa diri’ nang dah ampir kalah basaikng man bahasa lain, ngian baru’ hanya diri’ nang lea ngian raminya ka’ tumpuk, binua ngian ahe agi’ ana, MEA dah miah samaknya, makin kana’ kapetlah diri’ ase inak siap, inak bapaduliatn, untu’ koa kami baarap manyak ka’ ayukng2 samua, bujakng dara dayak, inje’ diri’ sama bajuang man cara-cara nang terhormat, elegan man transparan lewat organisasi IPDKR ngian, diri’ ngian organisasi nang mandiri, independen, memang ka’ organisasi ngian inak namu duit ato rajaki nang bisa ditele’ mata, tapi diri’ ngian bainvestasi budaya untuk ari2 ana. Diri’ nang muda’ Ame paranah water kak maraga keidupatn ngian ayukng2, salama’ Kulikng Langit masih Malangkokng, salama koa uga’ Jubata masih mihara diri’, coba tele’ kak mae diri’ melah langkokng ngkoa katele’atn bapelah uga’, saolah-olah diri’ dinyongkopi’ kawah arokng. Jukut koa ratinya rajaki masih ada. Ngian Jubata bapadah ka’ mae Talino ampus ka’ koa Ku bare’ rajaki kaparaluatn nang baik nang gagas.

Ayukng2 inje diri’ notok kaidupatn nang gagas

Inje’ diri’ barage bagago maraga idup nang bujur

Inje’ diri’ tojokatn kak dunia kade’ diri dayak ngian barinsi’, barinsi’ atinya, barinsi’ ilamunya, barinsi’ bahasanya.

Untu’ urakng-urakng tuha kami,

Kami ngian gi na’ manyak pangalaman, bajalatn pun masih kaja tarantuk, kak Kita’ kami mampaut, balajar idup, balajar sigana jukut nang baik. Ame kami dipatingalanan, ame kami digaranan, kade’ kami salah inak akan bera kami ditagur, kade’ carobo’ inak bera kami disasah dipalasah man nasehat-nasehat. Kade’ maraga kami kurang bujur, inak bera kami ditojokan bahkan diantat notok maraga nang bujur. Kade’ kira2nya dah gagas pajalanan kami ngian minta’ banto’ ayukngi man irikng kami, ame sampe dipaleo’atn utk kapentingan2 nang semu.

Mpakoa nang dapat aku sampeatn ampeatn, ampa ka’ adat kade’ balabih bera Jubata, kade’ kurang antu bera, lekoa uga’ omonganku ngia kade’ balabih minta ampon minta maaf, kade kurang minta ampon minta maaf uga. Tarima kasih man salamat malam.

Adil ka’ Talino, Bacuramin ka’ saruga, Basengat ka’ Jubata. Arus3x

Salam BABABA